وانا النهارده جايه من شغلي كانت المواصلات صعبه جدا وزحمه
قولت مش مشكله اركب اي حاجه واروح ..لآن الازمه حقيقي مالهاش حل
وقفت مشروع (ميكروباس) سوزوكو صغيور دا
وركبت بأعجوبه سبحان الله
السواق ملتحي وملتزم تبارك الله ماشاء الله
دخلت واستقريت وبعت للسواق الاجره
انا عارفه ان الاجره "نص جني" .. فبعت للسواق "جني بحاله"
وفضلت قاعده والمشروع بياكل في الطريق وانا بفكر وسرحانه في حال الناس - سبحان الله-
بعد شويه واحد قال علي جنب يا اسطي
نزلت عشان الراجل ينزل فلفت انتباهي ان السواق سأل الراجل اللي جنبه
مين بعت الاجره دي ؟؟
قاله الاخت اللي ورا
السواق ابتسم ابتسامه عريضه وراح ساكت
ركبت وكملت سرحاني
المهم فوقت لقيت السواق مبعتش باقي الاجره
قولت في عقلي وف بالي يعني كمان ملتحي وهتاكل عليا " النص جني "
مش معقول اعديها دي ..لو واحد متشرد هخاف اتكلم يضربني -هههههههههههه
بس دا اخ ملتحي وبعدين ميصحش ياكل عليا نص جني بحاله في وسط الازمه دي
المهم قولتله
-لو سمحت يا أخي حضرتك الاجره كام
-نص جني يا اختي
-طيب هو انا بعت لحضرتك كام (عامله نفسي مش واخده بالي ...ذوق بالفطرة بقي)
-انا لسه باقيلي 30 ساغ
-.................!! .....(في عقلي قولت لا مش معقول الكلام دا ..حتي الملتحي هيدخل فيا شمال )
فوقت لنفسي قولتله حضرتك انا مافيش معايا 30 صاغ :( ...هي الاجره غليت تاني
- بلعت الكلام وبقيت في وسط هدومي ما كان مني الا اني اعتذرت وبعتله جني واخدت النص جني الباقي وكمان الريال
****************************
كملنا الطريق وانا سرحانه وبقول سبحانك ربي
ممكن جدا يكون الانسان بيعمل حاجات علي اساس انها صحيحه وبيعتقد انو علي حق جااااااااامد واصلا مش واخد باله انو غلط
لا والادهي والاسوأ ان الطرف الاخر ساكت كنوع من الادب والاحسان وحسن الظن
انا مش قادره اوصف انا دعيت للاخ دا قد ايه
اكيد هو اعتبر اني ناسيه او معيش فلوس غيره فقال يكسب فيا ثواب
ومرضاش يكلمني عشان ميحرجنيش مثلا
خلينا نقيس الموضوع بشكل مختلف
وارد جدا نكون بنعمل كده كنساء مع ازواجنا او كرجال مع زوجاتنا
يعتقد واحد من الطرفين انو موفي ومكفي ولا غبار عليه
وسبحان الله الطرف الاخر برضه يكون مبتسم
ولكن في داخله مش قادر يتكلم عشان ادبه يمنعه انو يبينلك اد ايه انت مضايقني
وبيقول انا مستمر كنوع من احسان الظن وكمان اخد ثواب في اقامه بيت مسلم
سبحانك ربي ...لو كل واحد فكر يراضي التاني بأيه مش هيتعب ولا هيظلم
مينفعش راجل يراضي مراته بأنه ياخدها ويروح يلعب ستيمشن ...او بلياردو او يقعد ساكت بيتفرج ع التليفزيون
عشان يراضي مراته لازم يجبلها ورد...بيرفيام..
كمان هي عشان تراضي زوجها مش معقوله تعمله جلسه رغي وتقعد تحكي معاه علي فساتينها
عشان تراضي زوجها لازم تحضرله اكله بيحبها ..تهديله جو البيت ..تعمله حاجه هو بيحبها
يبقي لازم
الزوج يرضي زوجته كأنثى
وهي كمان تراضي زوجها كرجل
يااااااااااااه
ردحذفاد ايه الموقف دا علم معايا
جزاك الله خيرا